ភ្នំពេញ៖ តម្លៃប្រេងឥន្ធនៈនៅកម្ពុជាមានតម្លៃ ៥ ២៥០រៀលក្នុងមួយលីត្រសម្រាប់សាំងធម្មតា និង ៥ ៦០០រៀលសម្រាប់ប្រេងម៉ាស៊ូត ចាប់ពីថ្ងៃទី១ រហូតដល់ថ្ងៃទី១០ ខែឧសភា ឆ្នាំ២០២២។

យោងតាមសេចក្ដីជូនដំណឹងស្ដីពីថ្លៃលក់រាយប្រេងឥន្ទនៈនៅតាមស្ថានីយ តម្លៃនេះមានការកើនឡើង ១០០រៀលសម្រាប់ប្រេងសាំងធម្មតា និងប្រេងម៉ាស៊ូត បើធៀបនឹងតម្លៃចាស់។

នេះជាការឡើងលើកទី២ បន្ទាប់ពីស្គាល់នូវការចុះថ្លៃម្ដងកាលពីពាក់កណ្ដាលខែមេសា កន្លងទៅ។

អ្នកនាំពាក្យក្រសួងពាណិជ្ជកម្ម លោក ស៊ាង ថៃ ធ្លាប់ប្រាប់ EAC News ថាថ្លៃប្រេងសាំងនៅកម្ពុជាឡើងចុះគឺអាស្រ័យទៅនឹងតម្លៃប្រេងអន្តរជាតិដែលភាគច្រើនគឺគិតតាមមធ្យមភាគថ្លៃនៅទីផ្សារប្រទេសសឹង្ហបុរី ដែលមានន័យថាប្រសិនជាទីផ្សារនៅប្រទេសសឹង្ហបុរីចាប់ផ្ដើមឡើងថ្លៃគឺតម្លៃសាំងនៅកម្ពុជានឹងឡើងតាមនោះដែរ។

បញ្ហាសង្គ្រាមរុស្ស៊ី-អ៊ុយក្រែន កំពុងធ្វើឱ្យប៉ះពាល់តម្លៃប្រេងសាំងក្នុងពិភពលោកជាខ្លាំង ខណៈដែលរុស្ស៊ីដែលជាប្រភពថាមពលពិភពលោកមួយត្រូវរងទណ្ឌកម្មជាបន្តបន្ទាប់ក្រោយពីខ្លួនលុកលុយចូលអ៊ុយក្រែន។ ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី១ ខែមេសា នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានណែនាំដល់ក្រសួងពាណិជ្ជកម្មឲ្យពិភាក្សាជាមួយនឹងក្រុមហ៊ុនឯកជនដើម្បីគ្រប់គ្រងថ្លៃលក់រាយប្រេងឥន្ធនៈ និងរៀបចំស្តុកប្រេងឥន្ធនៈជាយុទ្ធសាស្ត្រ ដោយថាសភាពការណ៍អន្តរជាតិមានការវិវត្តស្មុគស្មាញ៕